Kryeministri në detyrë i Republikës së Kosovës, Albin Kurti, priti më 3 shkurt 2026 ambasadorin e Republikës së Turqisë në Kosovë, Sabri Tunç Angılı. Gjatë takimit, të dy palët diskutuan për thellimin e mëtejmë të partneritetit bilateral.
Kurti vlerësoi bashkëpunimin e deritanishëm, veçanërisht në fushën e sigurisë dhe mbrojtjes, si dhe rolin e rëndësishëm të Turqisë në misionin e NATO-s në Kosovë, përfshirë komandën e KFOR-it. Ai theksoi se ky bashkëpunim do të vazhdojë edhe në të ardhmen dhe falënderoi ambasadorin Angılı dhe Republikën e Turqisë për gatishmërinë dhe partneritetin.
Në takim u trajtua gjithashtu raporti në fushën e ekonomisë dhe tregtisë ndërmjet dy shteteve. Palët diskutuan mundësinë e organizimit të një forumi të biznesit në Prishtinë këtë vit, pas forumit të parë të mbajtur në Stamboll në qershor 2024.
Ambasadori Angılı e uroi kryeministrin Kurti për fitoren në zgjedhjet e 28 dhjetorit 2025. Kurti e falënderoi ambasadorin për takimin, komunikimin e vazhdueshëm dhe ftesën e Republikës së Turqisë për pjesëmarrje në Forumin Diplomatik në Antalia.