Kryeministri i Kosovës, Albin Kurti, gjatë qëndrimit në New York për sesionin e 81-të të Asamblesë së Përgjithshme të Kombeve të Bashkuara, u takua me kongresistin amerikan Joe Wilson. Wilson shërben si bashkëkryesues i Komisionit të Helsinkit dhe është anëtar i komisioneve për Punë të Jashtme dhe Forcat e Armatosura të Dhomës së Përfaqësuesve.
Gjatë takimit, palët diskutuan mbi thellimin e bashkëpunimit mes Kosovës dhe Shteteve të Bashkuara të Amerikës, me theks te siguria, mbrojtja, investimet dhe sundimi i ligjit. Kryeministri Kurti theksoi synimin e vendit për anëtarësim në NATO dhe vazhdimin e partneritetit të Forcës së Sigurisë së Kosovës me Gardën Kombëtare të Iowa-s, bashkëpunim që zhvillohet që nga viti 2011. Gjithashtu, u diskutua për avancimin e pjesëmarrjes së Kosovës në organizata ndërkombëtare, përfshirë aspiratën për pjesëmarrje të plotë në OSBE.
Një pjesë e rëndësishme e takimit iu kushtua situatës së shqiptarëve në Preshevë, Bujanoc dhe Medvegjë. Kryeministri Kurti, i shoqëruar nga deputeti Shaip Kamberi dhe kryetarja e komunës së Preshevës, Ardita Sinani, paraqiti shqetësimet lidhur me:
- Nënpërfaqësimin e shqiptarëve në institucionet publike, si policia, gjyqësori dhe shëndetësia.
- Pasivizimin e adresave të banimit.
- Pengesat në arsimin në gjuhën shqipe.
- Mosnjohjen e diplomave të marra në Kosovë.
Kurti kërkoi që këto çështje të trajtohen nga Komisioni i Helsinkit dhe të ngrihen në nivel komunikimi me autoritetet në Beograd. Në mbyllje të takimit, kryeministri e falënderoi kongresistin Wilson për angazhimin e tij ndaj rajonit dhe e ftoi atë që të vizitojë sërish Kosovën në krye të një delegacioni të Kongresit.
Përditësime
Kryeministri Albin Kurti zhvilloi një takim edhe me kongresistin amerikan George Latimer në New York. Gjatë takimit, Kurti kërkoi zyrtarisht shndërrimin e Kampit Bondsteel në një bazë të përhershme ushtarake të Shteteve të Bashkuara në Kosovë. Kryeministri theksoi domosdoshmërinë e zbardhjes së fatit të personave të zhdukur me dhunë, duke kërkuar qasje të plotë në arkivat shtetërore të Serbisë. Gjithashtu, ai adresoi sulmin në Banjskë, duke kërkuar vendosjen para drejtësisë të Milan Radoiçiqit për përgjegjësinë e tij në ngjarje.