Kryeministri i Kosovës, Albin Kurti, ka udhëtuar më 27 mars 2026 për vizitë zyrtare në Francë, ka njoftuar Zyra e Kryeministrit.
Gjatë vizitës në Paris, Kurti pritet të zhvillojë një takim dhe drekë pune me presidentin e Francës, Emmanuel Macron.
Në kuadër të këtij takimi, pritet të diskutohen çështje bilaterale, bashkëpunimi ndërkombëtar, zhvillimet politike dhe ekonomike në Kosovë dhe rajon, si dhe mundësitë për thellim të bashkëpunimit në ekonomi, investime e siguri.
Zyra e Kryeministrit nuk ka dhënë detaje shtesë për axhendën e plotë të vizitës.
Vizita shënon një hap për fuqizimin e marrëdhënieve Kosovë–Francë dhe dialogun mbi çështjet strategjike rajonale.
Ky nuk është takimi i parë midis të dy udhëheqësve.
Herën e fundit ata u takuan më 29 tetor 2025, në kuadër të Forumit të Paqes në Paris.
Një takim tjetër ndodhi në vitin 2024, para ceremonisë hapëse të Lojërave Olimpike Paris 2024.
Përditësime
Kryeministri i Kosovës, Albin Kurti, udhëton për herë të parë në Francë që kur mori mandatin e tretë, për takim dhe drekë pune me Presidentin Emmanuel Macron.
Presidenti serb Aleksandar Vuçiç deklaroi se Kurti do t’i prezantojë Macronit dy kërkesa:
- Që Franca ta kushtëzojë Serbinë që të mos përdorë armë kundër shqiptarëve;
- Mbështetje për largimin e NATO-s nga Zona e Sigurisë Tokësore në kufi dhe marrjen e detyrës nga Forcat e Sigurisë së Kosovës.
Paris – Kryeministri i Kosovës, Albin Kurti, u takua me Presidentin francez, Emmanuel Macron, në Pallatin Élysée. Macron e uroi Kurtin për rizgjedhjen dhe mandatin e ri.
Në takim morën pjesë Ministri i Evropës dhe Çështjeve të Jashtme, Benjamin Haddad, ambasadori i Francës në Kosovë, Mehdi Halimi, dhe konsuli Lulzim Hiseni.
Të dy liderët theksuan rolin pozitiv të NATO-s/KFOR-it dhe misioneve të BE-së.
Kurti theksoi harmonizimin me BE-në, progresin në 35 nga 38 fusha reformash për Raportin e BE-së, dhe kërkoi mbështetje për integrimin evropian dhe anëtarësimin në organizata ndërkombëtare.
Diskutuan:
- Sigurinë e kufijve dhe kapacitetet mbrojtëse vendore;
- Dialogun me Serbinë dhe normalizimin;
- Bashkëpunimin me NATO-n dhe sigurinë rajonale.
Në ekonomi, ranë dakord për investime në edukim, forume biznesi pas atij të shkurtit dhe mbështetje për Lojërat Mesdhetare 2030 në Kosovë.