Ministrja në detyrë e Tregtisë, Mimoza Kusari-Lila, ka bërë thirrje për nisjen e komunikimit zyrtar ndërmjet Lëvizjes Vetëvendosje dhe subjekteve të tjera politike. Sipas saj, pas certifikimit të rezultateve të zgjedhjeve të zhvilluara më 7 qershor, partitë duhet të shfaqin qëndrime të unifikuara në nivel vendimmarrës.
Kusari-Lila vlerësoi se situata aktuale politike është më komplekse se në proceset e kaluara, për shkak të divergjencave të deklaruara nga përfaqësues të ndryshëm brenda të njëjtave grupime parlamentare. Ajo theksoi se deri më tani, përveç Aleancës, pjesa dërrmuese e partive nuk kanë dalë me vendime zyrtare, por vetëm me deklarime të përgjithshme që, sipas saj, e vështirësojnë arritjen e ujdisë për formimin e institucioneve të reja.
Lidhur me bashkëpunimin e mundshëm, ministrja theksoi nevojën që kryetarët e partive të prezantojnë pozicionet e qarta të subjekteve dhe grupeve të tyre parlamentare. Sa i përket kërkesave të ndryshme, ajo nënvizoi se projektet zhvillimore duhet të diskutohen në kuadër të programit qeverisës dhe jo si parakushte politike.