Dhoma e Specializuar e Gjykatës Kushtetuese (DhSGjK) refuzoi të enjten, më 5 shkurt, ankesën e ish-presidentit Hashim Thaçi, i cili po gjykohet në Hagë. Ankesa lidhej me pretendime për shkelje të të drejtave të tij themelore në lidhje me caktimin e Gjykatëses së Procedurës Paraprake dhe Gjykatësit të Vetëm në çështjen gjyqësore kundër tij lidhur me administrimin e drejtësisë.
DhSGjK konstatoi se disa prej ankesave ishin të parakohshme, ndërsa të tjerat të pabaza. Për rrjedhojë, e shpalli të papranueshme kërkesën referuese sipas rregullës 14 të Rregullores së Punës së saj.
Thaçi pretendoi se kryetarja e Gjykatës Speciale, Ekaterina Trendafilova, kishte caktuar të njëjtin gjyqtar për të aprovuar përgjimet speciale të Prokurorisë, për të konfirmuar aktakuzën për të njëjtat vepra penale dhe për të marrë vendime të tjera në të njëjtin rast. Kjo, sipas tij, përbënte shkelje ligjore. Për pasojë, ai kërkoi rrëzimin e aprovimit të aktakuzës së dytë, pasi përgjimet ishin lejuar nga një gjyqtar i caktuar jashtëligjshëm.
Më herët, në dhjetor 2024, Kushtetuesja Speciale kishte refuzuar ankesën e Thaçit për ligjshmërinë e përgjimeve në qendrën e paraburgimit.