Në Gjykatën Themelore të Prishtinës ka vazhduar seanca gjyqësore për vrasjen e Liridona Ademajt, ku i akuzuari Kushtrim Kokalla dha deklaratën e tij, duke iu përgjigjur pyetjeve të avokatit Ndrec Doda.
Kokalla kujtoi intervistimin në polici më 1 dhjetor 2023, kur ishte marrë në cilësinë e të dyshuarit. Ai tha se ndodhej në shtëpi kur policia e kontaktoi për t’u paraqitur në stacionin policor në Gjakovë. Sipas tij, mbërriti në Prishtinë rreth orës 20:00, ndërsa intervistimi filloi rreth 30 minuta më vonë.
Duke folur për trajtimin nga organet e rendit, Kokalla deklaroi se nuk kishte pësuar keqtrajtje fizike. Megjithatë, ai theksoi se para nisjes së intervistimit, hetuesit i kishin thënë se ishte “kryesori” i rastit, edhe pse nuk kishte ngritur gishtin. “Ma treguan pse më kanë arrestuar, më thanë që ti je kryesori, edhe pse nuk e ke ngritur gishtin, ti e ke bërë të gjithë skenarin dhe është në interesin tënd dhe tonin të tregosh si e ke bërë skenarin”, u shpreh ai. Gjatë kësaj periudhe, avokati nuk ishte i pranishëm.
Sipas deklaratës së tij, më pas i mundësua një bisedë e shkurtër me avokatin, rreth 2-3 minuta, ku kishte mohuar përfshirjen në rast. Kokalla përshkroi intervistimin si të zhvilluar nga 4-5 hetues policorë: njëri shkruante, tjetri bënte pyetje, pa e përfunduar përgjigjen e mëparshme.
Në fund, ai mohoi çdo lidhje me veprën penale. “Nuk kam pasur asnjë lidhje me këtë punë, që e kam takuar me Granitin e me Naimin për kryerjen e veprës”, deklaroi Kokalla.