Kuvendi i Komunës së Shtimes ka mbajtur mbledhje përkujtimore me rastin e përvjetorit të Masakrës së Reçakut më 15 janar 1999. Gjatë kësaj ceremonie, Kuvendi i ka akorduar Ambasadorit William Walker titullin nderues dhe ceremonial "Qytetar i Përjetshëm i Shtimes".
Ky titull u dha në nder të kontributit historik të Walker-it për zbardhjen e së vërtetës mbi masakrën e Reçakut, si dhe për lidhjen e tij të përhershme me qytetin e Shtimes dhe banorët e tij. Sipas njoftimit të komunës, nderimi shpreh mirënjohje institucionale ndaj rolit të ambasadorit në faktorizimin e krimeve të kryera në Reçak dhe në informimin e opinionit ndërkombëtar.
Kryesuesi i Kuvendit, Rrahman Jakupi, foli gjatë ceremonisë dhe theksoi rëndësinë e këtij akti. "Ambasadori Walker është pjesë e historisë sonë dhe e së vërtetës sonë. Sot, Komuna e Shtimes ia hap përjetësisht dyert dhe zemrën si qytetar i këtyre njerëzve, si dëshmitar i së vërtetës dhe si mik i pandarë i Reçakut", u shpreh Jakupi.
Titulli "Qytetar i Përjetshëm i Shtimes" përfaqëson nderimin më të lartë që jepet nga niveli komunal. Ai i dedikohet personaliteteve me ndikim historik, moral dhe njerëzor ndaj komunitetit.