Kuvendi i Shqipërisë, në një seancë të përbashkët, miratoi një deklaratë zyrtare ku shpreh indinjatën dhe mosdakordësinë e plotë me vendimin e fundit të Dhomave të Specializuara në Hagë. Aktgjykimi dënoi me gjithsej 81 vjet heqje lirie ish-drejtuesit e Ushtrisë Çlirimtare të Kosovës: Hashim Thaçin, Kadri Veselin, Rexhep Selimin dhe Jakup Krasniqin.
Kryetari i Kuvendit, Niko Peleshi, lexoi deklaratën ku theksohet se lufta e UÇK-së nuk mund të relativizohet, pasi ajo lindi si përgjigje ndaj represionit sistematik, spastrimit etnik dhe gjenocidit të ushtruar nga regjimi i Slobodan Millosheviçit. Në dokument vlerësohet se vendimi është thellësisht i padrejtë dhe përpjekje për të barazuar agresorin me viktimën.
Kuvendi i Shqipërisë shprehu shqetësim për standardet e dyfishta në trajtimin e së kaluarës dhe qëndroi kundër çdo përpjekjeje të Serbisë dhe Rusisë për të instrumentalizuar politikisht këtë proces gjyqësor. Institucioni angazhohet që në forumet ndërkombëtare të denoncojë krimet e luftës, aktet gjenocidale dhe dhunën seksuale të kryera në Kosovë.
Lidhur me hapat e mëtejshëm, Kuvendi nënvizon se ky vendim nuk është fjala e fundit dhe pret që shkallët e procesit të garantohen sipas standardeve të rregullta ligjore. Institucioni bëri thirrje për koordinim të ngushtë të veprimeve midis Kuvendit të Shqipërisë, Kuvendit të Kosovës dhe dy qeverive, për të adresuar këtë çështje përmes rrugëve institucionale.
Gjatë seancës, deputetët e Partisë Demokratike shfaqën stema të UÇK-së. Deputeti Tritan Shehu kërkoi procedimin e një rezolute të veçantë për dënimin e gjenocidit serb në Kosovë, duke kritikuar mungesën e një nisme të tillë deri më tani.