Këtë të shtunë u zhvilluan dy ndeshjet e para të javës së dytë në Superligën shqiptare të futbollit. Në stadiumin “Arena Egnatia” në Rrogozhinë, Laçi triumfoi me rezultatin 2-1 ndaj Partizanit. Protagonisti kryesor i sfidës ishte Stiven Bibo, i cili realizoi dopietë, fillimisht në minutat e para të takimit dhe më pas në të 74-ën. Partizani luajti pjesën më të madhe të ndeshjes me një lojtar më pak, pasi mbrojtësi Marku u ndëshkua me karton të kuq pas ndërhyrjes së sistemit VAR në shtesën e pjesës së parë. Goli i Aliut në minutën e 90+2-të nuk mjaftoi për të shmangur humbjen e kryeqytetasve.
Ndërkohë, në stadiumin “Elbasan Arena”, Elbasani dhe Vllaznia barazuan 1-1. Shkodranët kaluan në avantazh me Muratajn në minutën e 18-të, ndërsa vendasit barazuan rezultatin me Hebajn në minutën e 75-të. Ndeshja pati një fund mjaft të kontestuar. Skuadra e Vllaznisë shënoi dy herë në shtesë me Tafilin dhe Mustën, por të dy golat u anuluan nga gjyqtarët për pozicion jashtë loje, duke bërë që ndeshja të mbyllet në barazim.
Përditësime
Laçi kryeson përkohësisht renditjen e Superiores me 4 pikë, pas suksesit në javën e dytë. Stiven Bibo i hapi rrugë fitores së kurbinasve me golin e minutës së 8-të. Ndërkohë, Elbasani dhe Vllaznia qëndrojnë në kuotën e 2 pikëve pas dy barazimeve radhazi. Analiza teknike pas ndeshjes konfirmoi se në rastet e anuluara të shkodranëve, Perez bllokoi pamjen e portierit në golin e parë, ndërsa Musta rezultoi në pozicion jashtë loje në të dytin.