Ylli i ri i Barcelonës, Lamine Yamal, ka përsëritur dëshirën e tij për të parë sulmuesin argjentinas Julian Alvarez si pjesë të skuadrës katalanase. Në një intervistë për gazetën spanjolle "Mundo Deportivo", 18-vjeçari e cilësoi kampionin e botës si një lojtar të nivelit të lartë, duke theksuar se bashkimi i tij me klubin do të pritej me kënaqësi nga të gjithë.
"Të gjithë e dinë se ai është një lojtar i madh, nga ata me të cilët të gjithë duan të luajnë. Ne jemi të hapur ta mirëpresim dhe nëse vjen, të gjithë do të jemi shumë të lumtur. Mendoj se përshtatet shumë mirë me stilin e Barcelonës. Nëse dëshiron të vijë, ne po e presim", deklaroi Yamal. Sipas tij, një transferim i tillë do të ishte një hap i rëndësishëm, pasi Alvarez do të luante për një ndër klubet më prestigjioze në botë.
Në anën tjetër, pozita e Julian Alvarez te Atletico Madrid paraqitet komplekse. Raportimet e mediave spanjolle tregojnë për një marrëdhënie të tensionuar midis futbollistit dhe trajnerit Diego Simeone. Burime pranë klubit sugjerojnë se tekniku argjentinas, i zhgënjyer nga dëshira e lojtarit për t'u larguar, është i gatshëm të lejojë shitjen e tij, duke krijuar hapësirë për negociata mbi të ardhmen e kampionit të botës.