Lapaj në protestë: Bashkim popullor kundër Ramës, jo liderësh

Adriatik Lapaj, kreu i Shqipëria Bëhet, deklaroi në një prononcim për A2CNN para dhe gjatë protestës së të shtunës, më 31 janar 2026, para Kryeministrisë, se vendi ka nevojë për një bashkim të madh opozitar përtej kryetarëve të partive.

Lapaj theksoi se duhet reformim total i sistemit elektoral, i cili i ka falur pushtetin në tavolinë Edi Ramës. Ai kërkoi nga i gjithë spektri opozitar të distancohet plotësisht nga Edi Rama dhe nga marrëveshja e fundit për Kodin Zgjedhor. "Duhet një Kod i ri Zgjedhor që e çon hakun te i zoti, që do të thotë që vota vlen njësoj në të gjithë vendin", tha ai.

Sipas Lapajt, bashkimi duhet të jetë popullor dhe qytetar, përtej flamujve të partive dhe kryetarëve. "Ne kemi thënë një bashkim i madh opozitar në shesh përtej kryetarëve dhe përtej flamujve të partive. Theksi duhet të vëhet te Bashkimi Popullor sepse nevoja është e përbashkët. Jo te liderët", deklaroi ai. Ai sqaroi se nuk bëhet fjalë për marrëveshje me Sali Berishën, por për imponim të një bashkimi qytetar përballë Edi Ramës, pasi nevoja për ta hequr atë është imediate.

Lapaj nënvizoi se askush nuk mund të mbajë peng popullin dhe se ata që duan ndryshimin duhet të bëjnë një hap pas. Bashkimi popullor synohet për nevojën aktuale, jo për fushatë zgjedhore apo zgjedhje të ardhshme. "Këta po e vjedhin vendin sot dhe duhet të ikin sot. Duhet të ikin falë një bashkimi të madh popullor, përtej nevojave apo halleve të kryetarëve të partive", u shpreh ai.

Ai përmendi se Shqipëria është në këtë gjendje për shkak të marrëveshjes së 2008-ës për ndryshimin e Kushtetutës midis Edi Ramës dhe Sali Berishës. Lapaj kërkoi që Partia Demokratike dhe gjithë opozita të distancohet nga Edi Rama dhe të pozicionohet krah demokratizimit të vendit. Protesta u zhvillua sipas pikave të parapara, ku forumi nuk përfaqësohet nga kryetarët e partive, por përmes qytetarëve, demokratëve, lëvizjeve dhe shoqërisë civile.