Kapiteni i Interit, Lautaro Martinez, ka sqaruar prapaskenat e merkatos së verës në një prononcim për Sky Italia gjatë ceremonisë Gran Galà del Calcio, të mbajtur në Teatro alla Scala të Milanos. Sulmuesi konfirmoi se zërat për një transferim të mundshëm te Barcelona ishin të vërteta, duke sqaruar se oferta erdhi në ditët e fundit të muajit gusht.
Martinez theksoi se interesimi nga një klub i tillë i madh i jep kënaqësi çdo futbollisti, pasi tregon punën e bërë në nivelet më të larta, por sqaroi se idetë e tij ishin të qarta për të qëndruar. “Interi për mua do të thotë gjithçka: krenari, lumturi dhe dëshirë për të vazhduar. Për sa kohë që më duan dhe jam i nevojshëm, unë do të qëndroj këtu”, u shpreh kapiteni, duke nënvizuar lidhjen e tij me shokët e skuadrës dhe tifozët.
Në të njëjtin prononcim, Martinez komentoi edhe largimin e drejtorit sportiv Piero Ausilio, duke shprehur keqardhje për këtë zhvillim. Ai falënderoi Ausilion për besimin e treguar ndaj tij që nga fillimi i projektit dhe për mbështetjen e vazhdueshme në karrierën e tij.
Përditësime
Arsenali ka tentuar transferimin e Lautaro Martinez, pasi dështoi të siguronte shërbimet e Julian Alvarez. Anëtari i stafit të Arsenalit, Gabriel Heinze, kontaktoi sulmuesin për një kalim të mundshëm në Premier League. Interi hodhi poshtë ofertën e klubit anglez, duke konfirmuar se nuk do të lejojë largimin e kapitenit.