Lumir Abdixhiku, kryetar i Lidhjes Demokratike të Kosovës (LDK), ka njoftuar emërimin e tre funksionarëve në pozita kyçe partiake.
Këto emërime realizohen në përputhje me autorizimet e Kuvendit të fundit të partisë dhe orientimet e Deklaratës Politike të miratuar aty.
• Ilir Ferati, kryetar i komunës së Istogut, emërohet sekretar i përgjithshëm, me përgjegjësi për drejtimin dhe koordinimin e aparatit institucional e administrativ, si dhe zbatimin e vendimeve të organeve drejtuese.
• Sokol Haliti, kryetar i komunës së Vitisë, emërohet sekretar për mërgatën, për të forcuar lidhjet me diasporën dhe për të përfshirë atë në jetën politike e zhvillimore të vendit.
• Visar Azemi, anëtar i kryesisë, emërohet sekretar organizativ, për koordinimin e strukturave partiake dhe forcimin e funksionimit në të gjitha nivelet.
Abdixhiku theksoi se këto ndryshime përbëjnë pjesë të fazës së konsolidimit organizativ dhe politik të LDK-së.
Ai shprehu mirënjohje për Imri Ahmetin, i cili deri në Kuvendin e fundit ushtroi detyrën e sekretarit të partisë me integritet dhe përkushtim.
Kreu i LDK-së bëri të ditur se së shpejti do të prezantojë përbërjen e re të Kryesisë së partisë, si pjesë e procesit të riorganizimit.
Bashkëpartiaku Shkëmb Manaj e cilësoi emërimin e Feratit si hap të rëndësishëm drejt ristrukturimit të partisë, duke uruar të emëruarit dhe theksuar nevojën për forcim të organizimit të brendshëm për të rikthyer besimin e qytetarëve.