Përfaqësuesit e Lidhjes Demokratike të Kosovës (LDK) u deklaruan sot para mbledhjes së grupit parlamentar, duke u fokusuar te zhvillimet politike dhe nevoja urgjente për formimin e institucioneve të reja. Deputetja Jehona Lushaku-Sadriu e vlerësoi situatën aktuale si një udhëkryq dhe sfidë kushtetuese për vendin. Ajo i bëri thirrje partisë së parë që të ndërmarrë veprimet e duhura për të mundësuar funksionalizimin e Kuvendit, duke theksuar se LDK-ja nuk dëshiron që situata të përshkallëzohet në përçarje qytetare apo konflikt.
Nga ana tjetër, deputeti Anton Quni theksoi se LDK-ja po tregon përmbajtje për të shmangur rrethanat që mund të gjenerojnë incidente. Ai bëri thirrje për qetësi, racionalitet dhe dëgjim të ndërsjellë për tejkalimin e problemeve aktuale. Në lidhje me mundësinë e ndonjë bashkëpunimi, Quni iu referua deklarimeve të kryetarit të partisë, Lumir Abdixhiku, duke konfirmuar se bisedat e fundit me kryeministrin në detyrë, Albin Kurti, nuk kanë sjellë ndonjë epilog pozitiv.
Sipas përfaqësuesve të LDK-së, nuk vërehen shenja të materializimit të ndonjë marrëveshjeje politike. Të dy deputetët konfirmuan se partia është e interesuar që seanca konstituive të mbahet sa më parë dhe se janë të gatshëm të bashkëpunojnë me të gjithë spektrin politik për të shmangur bllokadën institucionale.