LDK kundërshton nismën për ndryshimin e Ligjit për Dhomat e Specializuara

Kuvendi i Kosovës ka miratuar në lexim të parë Projektligjin për ndryshimin dhe plotësimin e Ligjit për Dhomat e Specializuara, duke siguruar 91 vota pro. Përkundër mbështetjes së gjerë parlamentare nga Lëvizjen Vetëvendosje dhe Aleanca për Ardhmërinë e Kosovës (AAK), nisma mbetet objekt debati për shkak të qëndrimeve të ndryshme politike dhe pasojave në besueshmërinë ndërkombëtare të vendit. Nënkryetarja e Partisë Demokratike të Kosovës (PDK), Vlora Çitaku, ka bërë të ditur se subjekti i saj do të qëndrojë në Kuvend deri në votimin e projektligjit në lexim të dytë, duke nënvizuar se ky proces nuk duhet të ndërlidhet me zgjedhjen e presidentit.

Lidhja Demokratike e Kosovës (LDK) vazhdon ta kundërshtojë këtë nismë. Shefja e Grupit Parlamentar të LDK-së, Jehona Lushaku-Sadriu, deklaroi se ndonëse për LDK-në lufta e Ushtrisë Çlirimtare të Kosovës (UÇK) është e shenjtë, ndryshimet ligjore rrezikojnë të dobësojnë pozitën ndërkombëtare të Kosovës. Ajo argumentoi se kontestimi i aktgjykimeve duhet të ndodhë vetëm përmes rrugëve gjyqësore. Ky qëndrim ka shkaktuar përçarje brenda strukturave të LDK-së, ku asambleisti i kësaj partie në Obiliq, Labinot Mirena, ka dhënë dorëheqje të parevokueshme nga të gjitha funksionet partiake si shenjë proteste ndaj kursit të ndjekur nga partia.

Kryeministri Albin Kurti ka konfirmuar mbështetjen e partisë së tij për projektligjin, ndonëse e cilësoi procedurën si të ngutshme. Në të njëjtën linjë, kryetari i AAK-së, Ramush Haradinaj, ka bërë të ditur se partia e tij voton pro për t'i dhënë fund këtij procesi ligjor. Nisma kishte marrë më parë dritën jeshile në Komisionin për Legjislacion, ku u votua në mënyrë unanime nga anëtarët e pranishëm. Përfaqësuesja e LDK-së në këtë komision, Doarsa Kica-Xhelili, nuk mori pjesë në proces, pa ofruar sqarime shtesë për këtë mospjesëmarrje.