Kryesia e Lidhjes Demokratike të Kosovës (LDK) ka mbajtur mbledhje me kryetarët e degëve duke filluar nga ora 15:00, për të analizuar situatën politike pas zgjedhjeve të 7 qershorit. Takimi i thirrur nga kryetari i partisë, Lumir Abdixhiku, fokusohet në diskutimin e rezultateve zgjedhore dhe pozicionimin e subjektit në procesin e formimit të institucioneve të reja.
Nënkryetari i LDK-së, Lutfi Haziri, deklaroi para takimit se partia mbetet e përkushtuar për të qenë pjesë aktive e ndërtimit të institucioneve shtetërore. "Sot e kemi Kolegjiumin e Degëve të LDK-së. Në situatë paszgjedhore është pjesë e punës ku kryetari i LDK-së dhe organet e partisë fillojnë me e trajtu situatën paszgjedhore. Kjo është në funksion të proceseve politike në të cilën LDK-ja ka vendosur parimisht të jetë pjesë aktive e ndërtimit të institucioneve", u shpreh Haziri.
Mbledhja vjen në një moment të ndjeshëm për subjektin, pas shfaqjes së kërkesave publike për dorëheqjen e kryetarit Lumir Abdixhiku si pasojë e rezultatit të zgjedhjeve të qershorit. Sipas Hazirit, qëndrimet zyrtare të partisë do të bëhen publike pas përfundimit të diskutimeve.