Kuvendi i Kosovës miratoi të enjten në mbrëmje, në seancë të jashtëzakonshme, një rezolutë që i kërkon Dhomave të Specializuara dhe Zyrës së Prokurorit të Specializuar në Hagë të ushtrojnë proces gjyqësor të drejtë ndaj ish-udhëheqësve të Ushtrisë Çlirimtare të Kosovës (UÇK), si Hashim Thaçi dhe të tjerët.
Deputetët e Lidhjes Demokratike të Kosovës (LDK) nuk morën pjesë në votim. Në një deklaratë publike të premten, partia shpjegoi se kishte kërkuar përfshirjen e obligimit institucional për zbardhjen e të gjitha vrasjeve të pazbardhura pas luftës, përfshirë vrasjet politike.
Sipas LDK-së, Kuvendi ka detyrim historik dhe politik për të folur me një zë të përgjegjshëm, të plotë dhe të drejtë për drejtësinë, jo me rezoluta të pjesshme dhe selektive. Partia mbështet fuqishëm parimin e gjykimit të drejtë, të paanshëm dhe në përputhje me standardet më të larta kushtetuese e ndërkombëtare për çdo qytetar të Kosovës, si vlerë themelore e shtetit ligjor dhe orientimit euro-atlantik.
LDK vlerëson se drejtësia nuk mund të trajtohet si koncept i fragmentuar, pasi ajo ose vlen për të gjithë, ose rrezikon të humbasë legjitimitetin. Refuzimi për të përfshirë kërkesën e bëri rezolutën të paplotë në thelb dhe me mesazh të mangët.
Grupi Parlamentar i LDK-së refuzoi të legjitimojë një qasje të njëanshme ndaj drejtësisë. Qëndrimi është aktiv dhe parimor, dhe partia do të vazhdojë të kërkojë drejtësi për të gjitha viktimat, procese të drejta e paanshme, si dhe përballje institucionale me të vërtetën. Ky është borxh ndaj viktimave, shoqërisë dhe shtetit të Kosovës.
Përditësime
Kuvendi miratoi me 90 vota pro rezolutën për mbrojtjen juridike të ish-krerëve të UÇK-së.
Përparim Gruda, deputet i PDK-së, prezantoi rezolutën dhe deklaroi se është hartuar nga ekspertë të pavarur.
Rezoluta:
- Referon Raportin e Këshillit të Evropës 2011, duke theksuar se akuzat e raportit nuk janë përfshirë në aktakuza pas një dekade;
- Nderon sakrificën e UÇK-së;
- Kërkon monitorim nga shtetet financuese dhe organizatat ndërkombëtare;
- Konfirmon mbështetje institucionale dhe financiare për mbrojtjen juridike të të akuzuarve.
Para votimit, LDK kërkoi shtimin e një pike për zbardhjen e vrasjeve pas luftës. LDK nuk mori pjesë në votim.