Jehona Lushaku-Sadriu, shefja e Grupit Parlamentar të LDK-së, deklaroi se oferta e kryeministrit Albin Kurti synon propozimin e një kandidati të dytë nga LDK-së për ta mundësuar zgjedhjen e kandidates së LVV-së, Feride Rushiti, si presidente e Kosovës.
Sipas Lushaku-Sadriu-së, LDK ka 15 nënshkrime për kandidatin e saj, për të cilin kryetari Lumir Abdixhiku ka përmendur mundësinë e Vjosa Osmanit. Ajo theksoi se nuk ka dilemë për kandidatin, por dyshim për qëllimin e ofertës. "Ajo që nuk ia ka dhënë populli Kurtit, nuk mund ta japim ne", shtoi ajo.
Kurti deklaroi se është i gatshëm t’i japë 15 nënshkrime LDK-së nëse ajo propozon kandidat dhe zhvillohet garë mes Rushitit dhe kandidatit të LDK-së. Ai pranoi edhe Vjosa Osmanin si kandidate kundër Rushitit dhe pret emrin zyrtar nga LDK-ja.
Lushaku-Sadriu pyeti nëse LVV do t’i japë 66 vota kandidatit të LDK-së. Deputetja Hykmete Bajrami postoi në Facebook se Kurti kërkon krijimin e kuorumit për zgjedhjen e presidentit.
Seanca për zgjedhjen e presidentit vazhdon sot në Prishtinë, në ditën kur skadon afati i Gjykatës Kushtetuese. Opozita bojkoton punimet. Në seancën e së hënës, me pjesëmarrje vetëm të shumicës, Rushiti mori 63 vota në raundin e parë, ndërsa Hatixhe Hoxha asnjë votë, me një votë të pavlefshme.