Deputeti i LDK-së, Besian Mustafa, ka njoftuar se sot do të paraqesë zyrtarisht amendamentin për përfshirjen e buxhetit të Prishtinës në Ligjin për Buxhetin e Republikës së Kosovës për vitin 2026. Kjo do të ndodhë në mbledhjen e Komisionit Parlamentar për Buxhet në orën 13:00.
Mustafa thekson se Prishtina, si qendër kryesore ekonomike, akademike, shëndetësore dhe administrative e Kosovës, përballon çdo ditë fluks masiv qytetarësh nga të gjitha komunat. Zhvillimi i infrastrukturës dhe përmirësimi i shërbimeve të saj ndikojnë drejtpërdrejt në jetën e qindra mijëra qytetarëve që punojnë, studiojnë ose marrin shërbime aty.
Ai kërkon mbështetje nga të gjitha partitë parlamentare, duke e cilësuar amendamentin si domosdoshmëri për një shtet më funksional, jo si favor lokal apo betejë politike. "Prishtina nuk u përket vetëm banorëve të saj, por mbarë Kosovës", shkroi Mustafa.
Sipas tij, interesi i përgjithshëm shtetëror duhet të lartësohet mbi çdo ndasi partiake kur bëhet fjalë për kryeqytetin.
Përditësime
Besian Mustafa tërhoqi amendamentin e tij për përfshirjen e buxhetit të Prishtinës në Ligjin për Buxhetin 2026.
Buxheti i Prishtinës, i miratuar nga Kuvendi Komunal më 6 shkurt, u përfshi në tabelat buxhetore të projektligjit me rekomandimin e ministrtit Hekuran Murati.
Sipas Mustafës, amendamenti lidhej me nenin 36 dhe u tërhoq për të siguruar pajtueshmëri të gjerë.