Lidhja Demokratike e Kosovës (LDK) ka njoftuar anëtarësinë për rifunksionalizimin e Kolegjiumit të Degëve të Prishtinës, si pjesë e procesit të riorganizimit të brendshëm dhe në përputhje me autorizimet e dhëna nga Kuvendi i partisë.
Ky mekanizëm synon koordinimin, vendimmarrjen dhe forcimin e strukturave të LDK-së në kryeqytet. Kolegjiumi do të shërbejë si platformë e përbashkët për harmonizimin e qëndrimeve politike në çështjet që lidhen me Kryeqytetin, duke siguruar një qasje të unifikuar, të qëndrueshme dhe të përgjegjshme në përfaqësimin politik e institucional.
Në vijim, së shpejti do të miratohen aktet normative që përcaktojnë organizimin, kompetencat dhe mënyrën e funksionimit të Kolegjiumit, për të rritur efikasitetin dhe transparencën në veprimtarinë politike.
Gjithashtu, pritet një takim me asambleistët e LDK-së në Prishtinë për koordinimin e mëtejshëm të veprimit në Kuvendin Komunal dhe avancimin e qëndrimeve të përbashkëta.
Angazhimi i partisë përqendrohet në zbatimin e programit për Kryeqytetin, duke synuar përmirësimin e shërbimeve publike, zhvillimin urban të qëndrueshëm dhe rritjen e cilësisë së jetës për qytetarët.