Le Iene, emision investigativ italian në Mediaset, ka publikuar pamjet nga operacioni i SPAK-ut dhe BKH-së në dy kulla shumëkatëshe në qendër të Tiranës, ku vepronte një call center e dyshuar për mashtrim ndaj qytetarëve evropianë.
Në video shihet momenti kur oficerët afrohen te recepsioni dhe thonë: „SPAK-u kontroll, asnjë lëvizje vajza. Mos i prekni telefonat“. Më pas dëgjohet: „Policia, mos lëviz. Duart mbi tavolinë“, ndërsa punonjësit shoqërohen me pranga.
Organizata dyshohet se fitonte 20-30 milionë euro në muaj përmes call centeve të koordinuara në Evropë, me seli në Shqipëri. Mashtrimi lidhet me bindjen e të huajve për të investuar në bursa.
Sipas një burimi, operacioni u dekonspirua fillimisht, zyrat u gjetën të boshatisura, por agjentët identifikuan bazën e re me 500 kompjutera gati për veprimtari, qindra hard diskë të jashtëm, USB dhe materiale të tjera, përfshirë kode për portafola digjitalë.
Në kërkim u shpallën edhe tre vëllezër nga Tropoja si organizatorë.
Masat e marra nga GJKKO
• Remir Gjoligaj – arrest me burg
• Endri Gjata – arrest me burg
• David Qerimi – arrest me burg
• Elis Merkaj – arrest me burg
• Rentjan Peposhi – arrest me burg me afat 20 ditë
• Odeas Kuqi – arrest me burg me afat 20 ditë
• Hysen Xhepexhiu – arrest me burg
• Klaudio Kaçupi – arrest me burg
Përditësime
Le Iene zbuloi se operacioni policor u zhvillua më 16 janar në Atti Tower dhe Downtown One në Tiranë. Një infiltrator me kamera të fshehura filmoi aktivitetin e përditshëm dhe udhëzimet e menaxherit për bindjen e klientëve. Persona të paguar survejonin godinën dhe njoftonin transferimin e materialeve në kosha mbeturinash për të shmangur zbulimin, të cilin Policia e Shtetit e ndaloi.