Personaliteti i njohur i futbollit evropian, Felix Magath, ka realizuar një vizitë dyditore në Kosovë, gjatë së cilës është takuar me përfaqësues të klubeve dhe institucioneve sportive.
Në ditën e parë, më 13 gusht, Magath vizitoi ambientet dhe kampin stërvitor të klubit Prishtina e Re. Ai u prit nga presidenti Rrustem Pacolli, nënkryetari Driton Gërxhaliu dhe drejtori i përgjithshëm Sami Boroci. Palët diskutuan mundësitë për bashkëpunime të ardhshme, me fokus të veçantë në zhvillimin e talenteve të Akademisë së Prishtinës së Re. Kjo vizitë u organizua nën kujdesin e afaristit Isak Neziri.
Në ditën pasardhëse, më 14 gusht, Felix Magath zhvilloi një takim me presidentin e Federatës së Futbollit të Kosovës (FFK), Agim Ademi. Gjatë këtij takimi, Ademi e njoftoi trajnerin gjerman me zhvillimin e futbollit në Kosovë, investimet në infrastrukturë dhe objektivat për të ardhmen. Së bashku, ata vizituan edhe Kampin Nacional të FFK-së, ku Magath u njoh me kushtet e ekipeve kombëtare dhe gjeneratave të reja. Ademi e cilësoi këtë vizitë si një ngjarje që nderon futbollin e Kosovës.