Libri “The Albanian Files” sjell dëshmi mbi ndryshimet arkitekturore në Shqipëri, duke u fokusuar te bashkëpunimi mes zyrtarëve shtetërorë dhe studiove të njohura ndërkombëtare për ndërtimin e kullave në Tiranë dhe resorteve në bregdet. Arkitekti Sam Chermayeff, i cili drejton një studio në Berlin dhe Nju Jork, përshkruan hyrjen e tij në tregun shqiptar pas një telefonate të marrë më 1 maj 2024.
Sipas dëshmisë së Chermayeff, kontakti fillestar u realizua përmes Adelajda Rokës, drejtuese e Agjencisë së Zhvillimit të Territorit. Arkitekti shkruan se iu kërkua hartimi i dy projekteve në Tiranë, me sipërfaqe përkatësisht 30 mijë metra katrorë dhe 15 mijë metra katrorë. Gjatë vizitës së tij në Shqipëri, ai u takua me një grup biznesmenësh lokalë për projektimin e një kulle 44-katëshe, ku iu dha liri e plotë krijuese.
I pyetur nga BIRN në fund të muajit qershor, Chermayeff pranoi se Adelajda Roka ishte pjesë e mekanizmit organizativ, edhe pse nuk konfirmoi drejtpërdrejt nëse ajo ishte ndërmjetësja kryesore me klientët. Libri përfshin gjithsej 60 arkitektë të studiove të ndryshme ndërkombëtare, të cilët janë bërë pjesë e planeve të zhvillimit urban nën administratën e kryeministrit Edi Rama.