Procesi i fshirjes dhe shuarjes së detyrimeve tatimore po vijon në përputhje me përcaktimet e Ligjit nr. 86/2025. Drejtoria e Tatimeve konfirmoi se deri më tani janë shuar detyrime me vlerë 313 milionë euro për 121,630 tatimpagues.
Sipas rregulloreve në fuqi, përfitimet ndahen sipas periudhave kohore:
• Për periudhën 2015–2019, tatimpaguesit përfitojnë falje të 50% të detyrimit principal dhe shuarje të plotë të gjobave e kamatëvonesave, me kusht shlyerjen e pjesës së mbetur prej 50% në periudhën 10 qershor – 30 qershor 2026.
• Për të njëjtën periudhë (2015–2019), tatimpaguesit që paguajnë 75% të detyrimit principal deri më 31 dhjetor 2026, përfitojnë fshirje të 25% të principalit dhe falje të plotë të gjobave e kamatëvonesave.
• Për periudhën 2020–2024, përfitohet falje e plotë e gjobave dhe kamatëvonesave, me kushtin e pagimit të 100% të detyrimit principal deri më 31 dhjetor 2026.
Pagesat për përfitimin nga falja me kusht kanë filluar zyrtarisht nga data 10 qershor 2026.
Përditësime
Administrata tatimore konfirmoi se falja e detyrimeve prej 313 milionë euro përfshin detyrimet ndaj administratës vendore dhe doganës. Procedura do të kryhet ekskluzivisht përmes kanaleve elektronike zyrtare.