Fatmir Limaj, kryetar i Nismës Socialdemokrate, ka dalë në mbështetje të Vedat Muriqit pas humbjes së Kosovës në finalen e play-off-it ndaj Turqisë.
Muriqi është përfolur shumë në rrjete sociale për këtë rezultat. Përmes një postimi në Facebook, Limaj shkruan: “Vedat, mos u mërzit. Çdo shtëpi e ka ‘berllogun’ e vet. Të tillët e kanë thuajse në natyrë me fyer e me etiketuar ata që me zemër i kanë shërbyer dhe i shërbejnë atdheut. Kështu kanë shpifur e etiketuar edhe për UÇK-në gjatë luftës dhe vazhdojnë edhe sot”.
“Ata, kur shpifin, nisen nga vetja e tyre, sepse nuk e kanë brumin për t’i shërbyer atdheut e për të qenë krenarë me zemër. Janë thjesht zëra që nuk përfaqësojnë vlerat e këtij vendi”, shton Limaj.
Ai i thotë kurajë Muriqit: “Mirënjohje për ty dhe ekipin, për emocionin dhe dashurinë që po ua transmetoni fëmijëve tanë për fanellën dhe shtetin. Vazhdo me kokën lart, jemi krenarë me ju”.
Postimi u publikua më 2 prill 2026 në Ekonomia Online.