Kryetari i Nismës Socialdemokrate, Fatmir Limaj, vlerëson se mbajtja e zgjedhjeve në këtë fazë do të përbënte një shmangie nga përgjegjësia institucionale dhe braktisje të përpjekjeve për mbrojtjen e ish-krerëve të UÇK-së që po përballen me procesin gjyqësor në Hagë. Në një prononcim për emisionin “Debat Plus”, Limaj argumentoi se zgjedhjet mund të krijojnë një vakum institucional, duke mundësuar vijimin e procedurave gjyqësore në Hagë pa angazhimin e duhur nga institucionet e Kosovës.
“Nëse shkohet në zgjedhje, shkohet me i ikë kësaj prej përgjegjësisë. Është me heq dorë nga mbrojtja e tyre. Nëse shkohet në zgjedhje, këta njerëz po duan me iu shmangë përgjegjësisë së tyre që duhet me marrë. Edhe gjashtë muaj nuk ke institucione këtu, ndërsa atje kryhen procedurat. Dhe mirëupafshim, ky është rezultati”, ka deklaruar Limaj.
Sipas ish-komandantit të UÇK-së, institucionet duhet të vazhdojnë punën e tyre dhe të shqyrtojnë hapa konkretë, siç janë ndryshimet e nevojshme ligjore për këtë çështje. Ai shprehu qëndrimin se shkuarja në zgjedhje, në këtë rrethanë, do të reflektonte një shmangie nga detyrat ndaj ish-krerëve të UÇK-së.
Sa i përket bashkëpunimit politik, Limaj ka njoftuar se deri në këto momente nuk ka marrë asnjë kontakt nga Qeveria e Kosovës apo nga partitë opozitare. Ai ka konfirmuar gatishmërinë e tij për të ofruar përvojën dhe idetë e tij nëse institucionet do të kishin nevojë për ndihmën e tij. “Unë e kam gatishmërinë time, nëse kanë nevojë për ndihmën time. Për çfarëdo që kanë nevojë, për shërbimet e mia, për idetë e mia. Deri sot nuk më ka kontaktuar kush. Nëse nuk kanë nevojë, le të thonë”, theksoi ai.