Pas disfatës 1-0 në finalen e Kupës së Botës 2026 kundër Spanjës, e cila u vendos pas kohës shtesë, e ardhmja e Lionel Messit me përfaqësuesen e Argjentinës mbetet objekt debati. Burime pranë lojtarit, të cituara nga TyC Sports, bëjnë të ditur se 39-vjeçari nuk kishte planifikuar largimin përpara nisjes së këtij kompeticioni.
Edhe pse raportimet e hershme sugjeronin përfundimin e rrugëtimit të tij pas 207 paraqitjesh dhe 125 golash, në opinionin argjentinas vlerësohet si pak e mundshme që finalja në New Jersey të ketë shënuar paraqitjen e tij të fundit zyrtare. Messi pritet të marrë një vendim përfundimtar gjatë muajve në vijim, pasi të ketë shqyrtuar objektivat e tij të ardhshme.
Pavarësisht rezultatit në finale, Messi vijoi të ishte lider i skuadrës, duke u renditur ndër lojtarët më të dalluar të turneut. Në nivel klubesh, ai vazhdon të jetë i lidhur me Inter Miami përmes një kontrate deri në vitin 2028, ku përfiton rreth 70 milionë euro në sezon.