Skuadra e Llapit ka siguruar qëndrimin në elitën e futbollit kosovar, pasi triumfoi me rezultatin 2:0 ndaj Dinamos së Ferizajt në ndeshjen e barazhit. Takimi, i cili u zhvillua në stadiumin “Rexhep Rexhepi” në Drenas, u vendos që në pjesën e parë.
Llapjanët, të udhëhequr nga trajneri Tahir Batatina, e nisën takimin me intensitet të lartë, duke goditur fillimisht transversalen pas një gjuajtjeje me kokë nga Landrit Rama. Zhbllokimi i rezultatit erdhi në minutën e 11-të, kur Fiton Ademi shënoi pas një harkimi nga krahu i djathtë i Arianit Hasanit. Avantazhi u dyfishua në minutën e 23-të nga Muhamet Hyseni, i cili u tregua i saktë nga pika e bardhë. Penalltia u akordua nga gjyqtari Alban Shala pas ndërhyrjes së parregullt të Ardian Shaljanit ndaj Arbër Bytyqit, vendim ky i konfirmuar edhe pas rishikimit nga sistemi VAR.
Në pjesën e dytë, Dinamo e Ferizajt u shfaq më kërkuese në sulm, duke krijuar disa raste shënimi, por pa arritur të konkretizonte asnjë prej tyre. Përkundër përpjekjeve të vazhdueshme të skuadrës së trajnerit Burim Çerkini për të ngushtuar diferencën, rezultati mbeti i pandryshuar deri në fund.
Me këtë fitore, Llapi siguron pjesëmarrjen në Superligë për edicionin e radhës, ndërsa Dinamo e Ferizajt mbetet në Ligën e Parë.