Qeveria e Mbretërisë së Bashkuar, e drejtuar nga kryeministri Keir Starmer, ka thirrur ambasadorin e Iranit në Londër, Seyed Ali Mousavi, në formë proteste diplomatike. Masa lidhet me veprime destabilizuese dhe aktivitete të dyshuara spiunazhi në territorin britanik në favor të Teheranit.
Incidenti kryesor është arrestimi i një shtetasi iranian dhe një shtetaseje britaniko-iraniane. Ata akuzohen për përpjekje hyrjeje të paligjshme në bazën detare Faslane, ku stacionohen nëndetëset bërthamore të Royal Navy. Autoritetet britanike kanë ngritur akuza për shkelje të ligjit të sigurisë kombëtare, me dyshimin se kanë ndihmuar një shërbim inteligjence të huaj.
Ministria e Jashtme britanike e cilëson ngjarjen si pjesë të një serie episodësh të ngjashëm nga Irani dhe strukturat e tij, të quajtura "të pamenduara dhe destabilizuese". Nota e protestës i referohet konkretisht rastit në Faslane.
Autoritetet sqarojnë se ky incident nuk ka lidhje me zjarrvënien e katër ambulancave në Londër, që i përkisnin një organizate hebraike. Një grup i vetëshpallur pro-iranian ka pretenduar përgjegjësinë, por kjo nuk është konfirmuar.
Një zëdhënëse e Ministrisë së Jashtme deklaroi: "Ky qeveri do të marrë të gjitha masat e nevojshme për të mbrojtur popullin britanik". Londra premton të denoncojë publikisht çdo veprim destabilizues të Iranit, brenda ose jashtë territorit të saj.