Deputeti i Partisë Demokratike, Luan Baçi, ka vlerësuar se Sali Berisha nuk ka rivalë për postin e kryetarit të forcës politike. Në një prononcim për emisionin "Puls" në A2 CNN, Baçi theksoi se procesi i referendumit për zgjedhjen e kryetarit u karakterizua nga një konsensus i gjerë i anëtarësisë dhe qetësi në zhvillim.
Lidhur me axhendën politike, Baçi deklaroi se fokusi aktual duhet të jetë te ripërtëritja e Këshillit Kombëtar dhe përgatitjet për zgjedhjet vendore të vitit të ardhshëm. Ai u shpreh optimist për mundësinë e fitores së Bashkisë së Tiranës, duke argumentuar se situata aktuale në Partinë Socialiste dhe arrestimi i kryetarit të bashkisë për korrupsion krijojnë rrethana favorizuese për opozitën.
Sipas deputetit, Partia Demokratike duhet të ndjekë një strategji të hershme për identifikimin dhe prezantimin e kandidatëve për zgjedhjet lokale. Ai nënvizoi se ky proces duhet të përfundojë sa më parë, në mënyrë që të shmanget shpallja e emrave pak kohë përpara nisjes së fushatës zgjedhore.