Analisti Fatos Lubonja zbuloi në emisionin Kjo Javë se kishte marrë një ftesë nga lideri i opozitës Sali Berisha për të marrë pjesë në një tryezë me partitë e vogla opozitare dhe përfaqësues të shoqërisë civile. Kjo tryezë synonte diskutimin e mundësive për bashkim opozitar kundër qeverisë aktuale.
Lubonja sqaroi se nuk mori pjesë pikërisht sepse ftesa ishte drejtpërdrejt nga Berisha. Ai theksoi se mbetet për idenë e bashkimit opozitar, por e koncepton atë në një kulturë të re politike, larg personalizimit rreth një figure kryesore. Sipas tij, opozita duhet të shmangë kulturën e vjetër të "njëshit", ku liderët si Berisha, Edi Rama, Fatos Nano apo Ilir Meta kërkojnë mbështetje rreth personave të tyre dhe më pas veprojnë ndryshe nga premtimet.
Lubonja propozoi ngritjen e një komisioni të formuar nga sa më shumë të rinj dhe figura të reja, për të eliminuar personalizimin dhe për të krijuar një lëvizje kolektive. Ai krahasoi bashkimin e duhur me hipjen në një anije ku të gjithë shkojnë në të njëjtën drejtim, pa mundësi për devijime individuale. Si shembull, përmendi Forum-in për Demokraci të vitit 1997, ku morën pjesë parti dhe shoqata pa një figurë dominuese, duke krijuar një bashkëpunim të vërtetë.
Ai deklaroi se nuk dëshiron të ftohet drejtpërdrejt nga Berisha, por do të marrë pjesë vetëm nëse një komision i tillë e fton atë. Kjo qasje, sipas Lubonjës, do të sigurojë garanci për një bashkim të qëndrueshëm dhe pa manipulime.