Pas zgjedhjeve të zhvilluara në organet drejtuese të Partisë Demokratike, Luçiano Boçi nuk u rikonfirmua në postin e nënkryetarit, detyrë të cilën tashmë e mban Belind Këlliçi. Në reagimin e tij pas procesit, Boçi vuri në dukje se votimi brenda Këshillit Kombëtar nuk ka qenë plotësisht i pastër.
"Momenti i votimit është një moment që ka shumë elementë brenda; nuk është shumë i pastër si moment, është shumë subjektiv dhe jo shumë objektiv", deklaroi Boçi në emisionin "Puls" në A2 CNN. Megjithatë, ai shtoi se si ai, ashtu edhe Këlliçi, kanë pasur të njëjtat mundësi gjatë garës dhe refuzoi të hynte në detaje të mëtejshme mbi procesin.
I pyetur për qëndrimin e kryetarit të Partisë Demokratike, Sali Berisha, i cili e cilësoi ekipin e ri si "ekipin më të mirë në histori", Boçi u shpreh se kjo është e drejta e kryetarit për të bërë vlerësime të tilla. Ai sqaroi se ekipet drejtuese varen nga momentumet politike, të cilat ndryshojnë në kohë.
"Ekipet varen edhe nga momentumi politik. Nuk është i njëjtë ky momentum me atë para katër vitesh, kur ne ishim para një situate shumë të vështirë dhe ku ishte në lojë ekzistenca e Partisë Demokratike", theksoi Boçi. Ai shtoi se shoqëria dhe partitë politike në Shqipëri shpesh vuajnë nga amnesia për situatat e kaluara, duke nënvizuar se nuk mund të bëhen krahasime të drejtpërdrejta mes periudhave të ndryshme politike.