Reshjet e dendura të shiut, të cilat kanë vazhduar që nga e martja, kanë çuar në rritje të ndjeshme të nivelit të lumit Vjosa në zonën e Vlorës. Në disa segmente të lumit, niveli i ujit ka tejkaluar 9 metra, duke rezultuar në përmbytje të tokave bujqësore dhe dëme në banesa të vendosura pranë zonave të rrezikut.
Në zonën e Memaliajt, niveli i ujit ka arritur 7.5 metra mbi nivelin e detit, duke mbuluar stacionin hidrometrik lokal. Si pasojë e kësaj, rreth 100 hektarë tokë janë zhytur nën ujë.
Situata ka ndikuar edhe në infrastrukturën e rëndësishme, ku është raportuar prani e ujit në Stacionin e Pompimit të Kafarajt, të vendosur në Njësinë Administrative Frakull. Ky stacion siguron furnizimin me ujë për qytetin e Fierit.
Deri tani, 14 banesa rezultojnë të prekura nga përmbytjet, sipas të dhënave të raportuara nga autoritetet lokale.