Kryetari i Lidhjes Demokratike të Kosovës (LDK), Lumir Abdixhiku, ka komentuar zhvillimet e fundit në këtë subjekt politik, pas kërkesave të publikuara nga disa përfaqësues partiakë për largimin e tij nga posti. Në një paraqitje në emisionin “Rubikon”, Abdixhiku i vlerësoi këto zhvillime si të pazakonta për traditën e funksionimit të LDK-së.
Ai shprehu pakënaqësi ndaj mënyrës së komunikimit të përdorur nga Imri Ahmeti dhe Gazmend Muhaxheri, duke theksuar se këta të fundit nuk u ballafaquan me të në mënyrë direkte. “Atipike që komunikimi me partinë tënde të bëhet nëpërmjet rrjeteve sociale dhe mbledhjet të thirren pa qartësi,” deklaroi Abdixhiku.
Lidhur me marrëdhëniet e tij të mëparshme me këta dy zyrtarë, kryetari i LDK-së u shpreh se ka qenë mbështetës i tyre në raste të ndryshme. Ai theksoi se i ka mbrojtur ata edhe kur kanë bërë gafa, duke deklaruar: “Kam hyrë në zjarr për ta. Kam bërë marrëveshje politike për ta, marrëveshje që nuk kanë dashur as t’i bëjnë publike”. Abdixhiku shtoi se prioritet i tij mbetet ruajtja dhe shpëtimi i partisë, duke i cilësuar reagimet e fundit si të papranueshme në formën se si janë manifestuar.