Lumnije Bunjaku rrëfen kujtimet për jetën e bashkëshortit të saj, rreshterit Afrim Bunjaku, i cili u vra në detyrë më 24 shtator 2023, kur një grup i armatosur serbësh sulmoi Policinë e Kosovës në fshatin Banjskë të komunës Zveçan. Ajo pret me ankth vendimin gjyqësor që do të shpallet më 24 prill ndaj të akuzuarve për këtë sulm. Afrim Bunjaku u shpall Hero i Kosovës pas vdekjes.
Sipas Lumnije Bunjaku, burri i saj ishte trim dhe patriot. Ajo shikon shpesh fotografinë e tij të madhe me shirit të zi në dhomën e ndejës së shtëpisë familjare në Samadrexhë të Vushtrrisë. “Nganjëherë them: Vetëm një herë po të më kishte hidhëruar, do t’ia kisha kujtuar”, shprehet ajo.
Lumnije Bunjaku kishte frikë nga rreziqet e profesionit që bashkëshorti i saj e dëshironte që nga martesa e tyre 30 vjet më parë. Megjithatë, ajo e mbështeste pasionin e tij. “E ka dashur këtë profesion gjithmonë. Thonë se edhe si fëmijë, kur e pyesnin në shkollë se çfarë dëshironte të bëhej, thoshte: ‘Dua të bëhem polic’”, kujton ajo për Radion Evropa e Lirë.
Kjo dëshirë iu plotësua Afrim Bunjaku në vitin 2001, kur nisi punën si polic i Kosovës. Çifti Bunjaku jetoi bashkë me prindërit e tij dhe katër fëmijët e tyre në Samadrexhë të Vushtrrisë, fshat rreth gjysmë ore larg zonës veriore të Kosovës.
Kjo zonë, e banuar me shumicë serbe, ka pasur tensione ndëretnike të vazhdueshme që nga përfundimi i luftës së vitit 1999. Ajo kundërshton në vazhdimësi autoritetet e Kosovës, ndërsa tensionet kulmuan me sulmin në Banjskë, sipas autoriteteve të Kosovës.
Përditësime
Autoritete të Kosovës deklaruan se sulmi synonte aneksimin e veriut të vendit.
- Afrim Bunjaku ishte në patrullën e parë reaguese të Policisë së Kosovës në orët e para të mëngjesit të së dielës në Banjskë.
- Bashkëshortja e tij, Lumnije Bunjaku, tha: "Sa herë që ndodhte diçka andej, sikur ma ndiente zemra... Ai ka qenë gjithmonë i gatshëm".