Jehona Lushaku-Sadriu, shefja e Grupit Parlamentar të LDK-së, deklaroi se në mbledhjen e Kryesisë së Kuvendit të Kosovës nuk u arrit konsensus për rendin e ditës. Kjo situatë bëri që rendi i ditës të procedohet për votim në seancë plenare.
Sipas saj, kishte një propozim të përgjithshëm për pikat e rendit të ditës, por propozimet e mëtejshme për renditjen e tyre nuk gjetën mbështetje të përbashkët. Lushaku-Sadriu theksoi mungesën e fleksibilitetit nga grupi më i madh parlamentar, duke e cilësuar si fatkeqësi që forcat me numër votash mbivotojnë në mbledhje të tilla pa treguar gatishmëri për kompromis në çështje procedurale si renditja e pikave.
Ajo ritheksoi se LDK-ja kishte mbështetur rezolutën dhe ishte fleksibël për renditjen e pikave. "Është vërtet për keqardhje që Kryesia e Kuvendit nuk arriti të gjejë një kompromis", tha ajo, duke nënvizuar se mungesa e fleksibilitetit erdhi nga grupi më i madh në Kryesi.
Lushaku-Sadriu bëri thirrje për diskutime intensive mes partive politike për të gjetur zgjidhje për institucionet dhe zgjedhjen e presidentit të vendit. Ajo paralajmëroi se, në mungesë të marrëveshjes gjatë ditëve të mbetura, rreziku i shkuarjes në zgjedhje të reja është shumë i madh. "Tani varet nga ata që kanë numrin më të madh të votave, por pa vullnetin politik të tyre nuk mund t’i jepet zgjidhje vendit dhe as nuk mund të zgjidhet presidenti", u shpreh ajo.