Policia e Lushnjës ka vënë në pranga 60-vjeçarin Izet Ymeri, i akuzuar për veprën penale "Plagosja e rëndë me dashje". Ngjarja u regjistrua në lagjen "Loni Dhamo", ku pas një konflikti për motive të dobëta, autori ka goditur me mjet prerës (thikë) kushëririn e tij, shtetasin F. Y., 71 vjeç.
Pas ndërhyrjes së shërbimeve të Komisariatit të Policisë Lushnjë, autori është arrestuar në flagrancë dhe mjeti i përdorur në krim është sekuestruar në cilësinë e provës materiale. I dëmtuari është transportuar me urgjencë në Spitalin e Traumës në Tiranë, ku ndodhet nën kujdesin e mjekëve, jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, e cila po vijon hetimet për zbardhjen e plotë të rrethanave të ngjarjes.
Përditësime
Policia e Lushnjes ka identifikuar viktimën e plagosjes me thikë si Faslli Ymeri, 71 vjeç. Ngjarja ka ndodhur një ditë përpara njoftimit zyrtar të autoriteteve.