Deputeti i Lidhjes Demokratike të Kosovës (LDK), Lutfi Haziri, ka reaguar pas mosftesës së Kosovës në Samitin e NATO-s të mbajtur në Ankara. Sipas tij, kjo situatë përbën një penalizim për vendin, i cili vjen si pasojë e drejtpërdrejtë e mungesës së stabilitetit institucional.
Në një shkrim të publikuar në rrjetin social Facebook, Haziri ka theksuar se bota po përjeton ndryshime të shpejta, ndërsa Kosova mbetet e bllokuar në një qark vicioz të krizave të brendshme politike. Ai ka bërë thirrje për një reflektim të thellë të klasës politike, duke vlerësuar se vetëm përmes bashkëpunimit për procese politike mund të arrihet normalizimi dhe stabilizimi i shtetit.
Së bashku me reagimin e tij, nënkryetari i LDK-së ka publikuar edhe një fotografi të presidentit historik, Ibrahim Rugova, gjatë një takimi të zhvilluar në selinë e NATO-s, duke përcjellë mesazhin se "Republika është mbi të gjithë".