Shefi i grupit të asamblistëve të Lëvizjes Vetëvendosje (LVV) në Kuvendin Komunal të Prishtinës, Gëzim Sveçla, njoftoi se grupi i tij ka kërkuar zyrtarisht nga Komuna e Prishtinës dosjet e plota për katër raste të legalizimit të objekteve, të cilat përmenden në mesazhet e publikuara së fundmi ku pretendohet se është i përfshirë shefi i kabinetit të kryetarit, Florent Maliqi.
Në një konferencë për media, Sveçla bëri të ditur se komuna nuk ka dorëzuar dosjet e plota, por vetëm certifikatat e legalizimit, veprim të cilin ai e cilësoi si mungesë transparence. Për këtë refuzim, LVV ka bërë ankesë pranë Agjencisë për Informim dhe Privatësi. Sveçla theksoi se verifikimet në Gjeoportal konfirmojnë se katër objektet në fjalë janë legalizuar nga e njëjta zyrtare e komunës.
Sipas LVV-së, hetimi duhet të shtrihet përtej mesazheve, duke përfshirë zinxhirin e vendimmarrjes dhe rolin e Florent Maliqit, i cili më parë ka ushtruar detyrën e Drejtorit të Urbanizmit dhe u.d. të Drejtorit të Kadastrit. Sveçla konfirmoi se asamblistët Çlirim Gërbeshi dhe Berita Abazi janë ftuar për intervistim nga Prokuroria Speciale e Republikës së Kosovës. Kryetari i Prishtinës, Përparim Rama, ka deklaruar më herët se komuna do të bashkëpunojë me organet e drejtësisë për zbardhjen e çdo shkeljeje të mundshme ligjore.