LVV paralajmëron intensifikim përpjekjesh për zgjedhjen e presidentit

Deputeti i Lëvizjes Vetëvendosje (LVV), Arbër Rexhaj, ka paralajmëruar intensifikim të përpjekjeve politike nga kryeministri Albin Kurti për zgjedhjen e presidentit, me vetëm nëntë ditë të mbetura nga afati kushtetues i 28 prillit.

Ai deklaroi se java e ardhshme do të karakterizohet nga takime më të shpeshta, duke theksuar nevojën për kalim nga diskutimet e përgjithshme në propozime konkrete për emra kandidatësh. "Unë pres intensitet të takimeve. Pres që të ketë takime gjatë javës së ardhshme. Natyrisht, duhet të kalojmë në propozime konkrete të emrave të zgjidhjes së problemit që na çon në drejtim të zgjedhjes së presidentit apo presidentes", tha Rexhaj.

Sipas tij, LVV nuk ka pengesa për këtë proces dhe është e bindur se presidenti duhet të zgjidhet. Dështimi do të çonte në një cikël krizash politike, ku zgjedhjet mund të përsëriten vazhdimisht. "Nëse tani nuk zgjidhet presidenti, ne hyjmë në një krizë apo cikël të krizave që nga zgjedhjet mund të prodhojnë zgjedhje të tjera", shtoi ai.

Rexhaj theksoi domosdoshmërinë e kompromisit ndërpartiak, duke vlerësuar diskutimin e kritereve siç propozon LDK-ja, por kundërshtoi kërkesën e PDK-së për ftesa zyrtare takimesh, duke e cilësuar si pengesë për komunikim. "Natyrisht, mbi bazën e kësaj, ne duhet t’i diskutojmë emrat dhe kriteret që po i thotë LDK-ja. Mirëpo nuk shkon edhe kërkesa e PDK-së që të ketë ftesë zyrtare, pasi këtë e lexojmë si ftesë për mos takim. Nuk duhet të barrikadohemi në qëndrime, por të ecim përpara drejt një zgjidhjeje", deklaroi ai.

Në të njëjtën kohë, ushtruesja e detyrës së presidentes, Albulena Haxhiu, u ka bërë thirrje partive për intensifikim takimesh gjatë javës në vijim. "Nuk kanë mbetur edhe shumë ditë. Por, në qoftë se ka vullnet, mund të kryhet brenda shumë pak orësh", tha ajo.

Në funksion të kësaj, të hënën në Kuvend në orën 11:00 mbahet takimi i pestë ndërmjet kryeministrit Kurti dhe kryetarit të LDK-së, Lumir Abdixhiku.