Presidenti francez Emmanuel Macron njoftoi sot mbështetjen e Francës për miratimin e sanksioneve të reja evropiane kundër Rusisë, pas incidentit me dron të regjistruar në aeroportin e Leipzigut. Përmes një postimi në platformën X, presidenti francez theksoi rëndësinë e unitetit evropian në mbështetje të Ukrainës dhe shprehu solidaritetin e plotë me Gjermaninë.
Sipas autoriteteve gjermane, incidenti ndodhi në fillim të muajit gusht, kur një dron i mbushur me eksploziv u dërgua në aeroportin e Leipzigut. Macron e cilësoi këtë ngjarje si një prej sulmeve hibride që po shtohen në Evropë dhe u shpreh se këto veprime nuk mund të mbeten pa përgjigje. “Duhet të jemi të bashkuar në mbështetje të Ukrainës. Franca do të vazhdojë të luajë plotësisht rolin e saj”, theksoi ai.
Ky incident ka shkaktuar shqetësim të shtuar në Gjermani dhe në NATO, për shkak të lidhjes së aeroportit me infrastrukturën strategjike për operacionet ushtarake gjermane dhe të Aleancës. Në kuadër të kundërmasave, Berlini pritet të propozojë përfshirjen e individëve të tjerë me shtetësi ruse në listat evropiane të sanksioneve.