Manchester City regjistroi fitore bindëse 3-0 ndaj Crystal Palace në ndeshjen e prapambetur të javës së 31-të të Premier League, të luajtur të mërkurën në mbrëmje në stadionin Etihad. Skuadra e trajnerit Pep Guardiola dominoi takimin nga fillimi deri në fund, duke siguruar tri pikë vendimtare në garën për titull.
Goli i parë erdhi në minutën 32-të, kur Antoine Semenyo finalizoi një aksion të rrjedhshëm me goditje precize në cepin e poshtëm të portës, me asist nga Phil Foden me thembër. Në minutën 40-të të pjesës së parë, Omar Marmoush dyfishoi avantazhin pas një goditjeje të devijuar brenda zonës, sërish me pasim nga Foden. Në fraksionin e dytë, City kontrolloi lojën, ndërsa në minutën 84-të, Rayan Cherki asistoi për Savinho, i cili vulosi rezultatin.
Crystal Palace tentoi reagime me dalje të shpejta dhe goditje nga distanca, por pa rrezikuar seriozisht portierin e vendasve. Portieri Henderson u dallua me disa pritje të rëndësishme për miqtë.
Pas kësaj fitoreje, Manchester City ka 77 pikë dhe zë vendin e dytë, dy pikë pas Arsenalit me 79 pikë. Crystal Palace renditet i 15-ti me 44 pikë. Dy xhiro para fundit të sezonit, gara për titull mbetet e hapur.
Arsenali do të luajë kundër Burnley në shtëpi dhe më pas në udhëtim te Crystal Palace (24 maj). City luan në udhëtim te Bournemouth dhe ndaj Aston Villa në shtëpi, përpara finales së Kupës FA ndaj Chelsea më 16 maj.