Mesfushori italian Manuel Locatelli ka rinovuar kontratën e tij me Juventusin deri në 30 qershor 2030. Lajmi është bërë zyrtar nga klubi torinez, i cili e ka njoftuar në rrjetet sociale.
28-vjeçari do të përfitojë një pagë vjetore prej rreth 4 milionë eurosh plus bonuse, rritje nga kontrata e mëparshme prej 3 milionësh që skadonte në 2028. Takimi për nënshkrimin u zhvillua mes drejtuesve të Juventusit, agjentëve të lojtarit dhe avokatit Cesare Di Cintio.
Locatelli u bashkua me Juventusin në gusht 2021 nga Sassuolo për rreth 37 milionë euro. Që nga atëherë, ai ka regjistruar 224 paraqitje zyrtare, 9 gola dhe 17 asiste. Ai është bërë një nga shtyllat e skuadrës dhe kapiten i saj.
Rinovimi vjen pas atij me trajnerin dhe synon krijimin e një grupi konkurrues për rikthimin në majën e futbollit italian dhe europian.