Ministri i Mbrojtjes i Kosovës, Ejup Maqedonci, reagoi të hënën në Facebook kundër deklaratave të kreut të ushtrisë serbe, gjeneralit Millan Mojsilloviq. Gjenerali serb kishte thënë në gazetën "Politika" se fuqizimi dhe modernizimi i Forcës së Sigurisë së Kosovës (FSK) ka karakter kërcënues për serbët në Kosovë dhe nuk kontribuon në paqe.
Maqedonci i hodhi poshtë pretendimet, duke thënë se FSK është forcë profesionale, e ndërtuar sipas standardeve më të larta demokratike. Fuqizimi dhe modernizimi i Ushtrisë së Kosovës nuk kërcënon askënd, por përbën të drejtë legjitime të çdo shteti sovran dhe domosdoshmëri për paqen, stabilitetin dhe sigurinë afatgjatë në vend e rajon.
Ministri nguli këmbë se mandati i FSK-së është mbrojtja e sovranitetit dhe integritetit territorial të Kosovës, si dhe garantimi i sigurisë për të gjithë qytetarët pa dallim. Ai shtoi se deklaratat e tilla synojnë frikësimin e komuniteteve ose justifikimin e politikave destabilizuese dhe nuk kontribuojnë në paqe e stabilitet.
Viteve të fundit, Kosova ka marrë ose blerë pajisje ushtarake kryesisht nga SHBA-ja, si dronët RQ-20 Puma, raketat Javelin dhe automjetet Humvee, në kuadër të përpjekjeve për ta shndërruar FSK-në në ushtri. Ky proces pritet të përfundojë në vitin 2028, sipas planit.
Serbët përbëjnë rreth 3.31% të popullsisë në Kosovë, sipas regjistrimit zyrtar të vitit 2024. FSK-ja ende kërkon leje nga misioni i NATO-s në Kosovë, KFOR, për të operuar në pjesën veriore, ku shumica është serbe. Ky kufizim u vendos nga ish-presidenti Hashim Thaçi në vitin 2013, me një letër për shefin e atëhershëm të NATO-s, Anders Fogh Rasmussen, dhe mbetet në fuqi.