Maqedonia e Veriut shënoi sot 35-vjetorin e pavarësisë, duke kujtuar vendimin e qytetarëve në referendumin e vitit 1991 për një shtet sovran. Ky jubile u shoqërua me mesazhe nga krerët më të lartë shtetërorë, të cilët vlerësuan rrugën e deritanishme, por vunë theksin edhe te sfidat për të ardhmen.
Presidentja Gordana Siljanovska-Davkova e cilësoi këtë datë si momentin kur ëndrra për një shtet të lirë u bë realitet. Ajo nënvizoi se ndërtimi i shtetit është një detyrim i vazhdueshëm brezash, duke bërë thirrje për çrrënjosjen e krimit dhe korrupsionit. Sipas saj, pavarësia mbështetet në besimin reciprok ndërmjet të gjitha komuniteteve. Presidentja shprehu shqetësim për emigrimin e të rinjve, duke theksuar nevojën për një shtet të zhvilluar, ku brezat e rinj do të mund të krijojnë familje dhe të ardhmen e tyre.
Kryetari i Kuvendit, Afrim Gashi, vlerësoi se ndërtimi i shtetit nuk përmbyllet me një akt politik, por kërkon punë të përditshme përmes institucioneve funksionale dhe zbatimit të barabartë të ligjit. Ai theksoi se diversiteti etnik, kulturor dhe fetar duhet të shërbejë si një forcë e përbashkët. Gashi shtoi se perspektiva evropiane mbetet një synim strategjik që duhet të bashkojë të gjithë qytetarët.
Nga ana tjetër, lideri i BDI-së, Ali Ahmeti, rikujtoi kontributin e shqiptarëve dhe komuniteteve të tjera në ndërtimin e shtetit, duke vënë në pah nevojën për barazi të plotë në të gjitha institucionet. Ndërkohë, kryeministri Hristijan Mickoski deklaroi se qeveria po investon për ta bërë vendin një vend më të mirë për të jetuar, duke pranuar se sfidat mbeten ende të pranishme pas tre dekadave e gjysmë pavarësi.
Përditësime
Ish-presidenti Stevo Pendarovski vlerësoi se pavarësia nuk është dhuratë, por angazhim i vazhdueshëm, duke kërkuar një shoqëri pa individë të privilegjuar. Presidentja Gordana Siljanovska-Davkova theksoi amanetin e KAÇKM-së, duke bërë thirrje për përgjegjësi vetjake të qytetarëve në ndërtimin dhe rregullimin e shtetit.
Kryeministri Hristijan Mickoski përcolli urimin e tij zyrtar për Ditën e Pavarësisë nga qyteti i Ohrit. Ndërkohë, kryetari i LSDM-së, Venko Filipçe, në mesazhin e tij për festën theksoi domosdoshmërinë e ndërtimit të një shteti evropian, me fokus te funksionaliteti i institucioneve dhe barazia para ligjit.