Marina franceze ka ndaluar një anije cisternë që po lundronte nga Rusia, me dyshimin se ishte duke shmangur sanksionet ndërkombëtare. Siç njoftoi presidenti i Francës, Emmanuel Macron, operacioni është zhvilluar në ujërat ndërkombëtare të Oqeanit Atlantik gjatë ditës së djeshme.
Tankeri, i identifikuar me emrin "Tagor", u ndalua me mbështetjen e disa partnerëve ndërkombëtarë, përfshirë Mbretërinë e Bashkuar, në përputhje të plotë me të drejtën ndërkombëtare të detit. Sipas presidentit Macron, ky veprim është ndërmarrë për të ndaluar praktikat e paligjshme që kontribuojnë në financimin e luftës së Rusisë kundër Ukrainës, e cila ka hyrë në vitin e saj të katërt.
"Është e papranueshme që anijet të anashkalojnë sanksionet ndërkombëtare, të shkelin ligjin e detit dhe të financojnë luftën që Rusia ka zhvilluar kundër Ukrainës për më shumë se katër vjet", theksoi Macron.
Përveç shkeljeve ligjore, kreu i shtetit francez paralajmëroi se anijet që nuk respektojnë rregullat bazë të lundrimit paraqesin kërcënim për sigurinë detare dhe mjedisin. Franca konfirmoi vendosmërinë për të vazhduar zbatimin e sanksioneve ndaj Rusisë pa kompromis.
Përditësime
Forcat speciale franceze ndaluan një tanker rus, pjesë e të ashtuquajturës 'Flotë Hije', gjatë një operacioni në Oqeanin Atlantik. Pamjet e publikuara nga Ministria e Mbrojtjes tregojnë trupat duke zbritur me helikopter në kuvertën e anijes. Ky aksion është pjesë e strategjisë perëndimore për të goditur rrjetin e eksportit të naftës ruse, ndërsa Londra dhe Parisi kanë shtuar monitorimin e anijeve ruse në ujërat ndërkombëtare.