Marko Gjuriq, Ministri i Punëve të Jashtme të Serbisë, reagoi ndaj vendimit të Komisionit Qendror të Zgjedhjeve (KQZ) për mosmiratimin e shpalljes së rezultatit përfundimtar të zgjedhjeve për Listën Serbe në Kosovë.
Gjuriq e cilësoi këtë veprim si shkelje të të drejtave politike të qytetarëve serbë në Kosovë. Ai theksoi se kjo po ndodh pikërisht në kohën kur Bashkimi Evropian ka nisur procesin e heqjes së masave ndaj qeverisë së Albin Kurtit.
Në një shkrim, Gjuriq deklaroi: “Veçanërisht shqetësues është fakti se një veprim i tillë po ndodh pikërisht në momentin kur Bashkimi Evropian po fillon procesin e heqjes së masave kundër qeverisë së Albin Kurtit, i cili po rezulton të jetë një hap që qartësisht nuk ka kontribuar në ndalimin e presioneve mbi serbët dhe komunitetet e tjera kombëtare jo-shumicë në Kosovë dhe as njoftimi për heqjen e tyre nuk ka ndihmuar në qetësimin e situatës ose në ruajtjen e standardeve demokratike.”
Gjuriq deklaroi se Serbia do të njoftojë partnerët ndërkombëtarë për këtë çështje dhe do të insistojë në respektimin e të drejtave politike të popullit serb në Kosovë.