Edon Zhegrova mund të rikthehet në kampionatin francez të futbollit. Sipas mediumit italian Mediafoot, klubi Marseille ka shfaqur interes konkret për shërbimet e tij gjatë afatit kalimtar veror.
Marseille planifikon riorganizim në repartin sulmues për sezonin e ardhshëm. Drejtuesit e klubit nga Ligue 1 po monitorojnë alternativa në treg, veçanërisht lojtarë nga Serie A. "Marseille po përgatit një riorganizim në sulm dhe po ndjek nga afër zhvillimet që lidhen me lojtarët nga Serie A. Rasti i Zhegrovës është ndër më të rëndësishmit", shkruan Mediafoot.
26-vjeçari e njeh mirë Ligue 1-ën, pasi ka pasur paraqitje të suksesshme me Lille. Ai u transferua te Juventusi vitin e kaluar dhe ka kontratë deri në qershor të vitit 2030.
Zhegrova nuk duket se është në planet e trajnerit aktual të Juventusit, Luciano Spalletti. Që nga ardhja në Itali, ai ka regjistruar vetëm 374 minuta lojë në të gjitha garat, çka ka shtuar spekulimet për largim.
Marseille ishte pranë transferimit të tij edhe verën e kaluar, por Lille nuk pranoi shitjen. Profili dinamik i Zhegrovës përputhet me nevojat në krahët e sulmit të klubit francez.