Kryetari i bashkisë së Prishtinës, Përparim Rama, ka njoftuar se transporti urban do të ofrohet pa pagesë më 17 shkurt, në kuadër të marshimit në mbështetje të ish-krerëve të Ushtrisë Çlirimtare të Kosovës (UÇK), të cilët gjykohen në Hagë.
Ky vendim synon lehtësimin e lëvizjes së qytetarëve drejt protestës, e cila do të zhvillohet në orën 17:00 në sheshin Skënderbeu në Prishtinë. Marshimi përkon me 18-vjetorin e shpalljes së Pavarësisë së Kosovës.
Në deklaratën e tij, Përparim Rama tha: “Ne përveç që kemi mbështetur këto procese edhe më parë, i çmojmë dhe i vlerësojmë, dhe duhet t’i lartësojmë përtej interesave partiake. Kjo është një çështje kombëtare. Do të jem aty, dhe trafiku urban do të jetë në shërbim të qytetarëve pa pagesë gjatë protestës”.
Bashkia e Prishtinës ka mbështetur më parë ngjarje të ngjashme, duke theksuar rëndësinë e tyre kombëtare.