Në seancën plenare të Kuvendit, mazhoranca me 82 vota rrëzoi kërkesën e Strukturës së Posaçme Kundër Korrupsionit dhe Krimit të Organizuar (SPAK) për heqjen e imunitetit parlamentar të Belinda Balluku. Ajo është ish-zv.kryeministre e shkarkuar, pezulluar dhe me masë sigurie nga Gjykata e Posaçme Kundër Korrupsionit dhe Krimit të Organizuar (GJKKO).
Menjëherë pas votimit, kreu i Lëvizjes Shqipëria Bëhet, Adriatik Lapaj, reagoi me një postim në Facebook. Ai shkroi: "Maskat ranë! Edi Rama me 82 vota u rreshtua në krah të abuzimit duke i dalë kundër drejtësisë!"
Lapaj shtoi se ndërkombëtarët tani janë të qartë se Edi Rama është i gatshëm të bëjë çdo gjë për pushtetin e tij. Ai pyeti nëse Parlamenti ka më moral të vazhdojë punën, nëse Rama mund të organizojë zgjedhje të lira dhe të ndershme, dhe nëse mund të bashkëjetohet me një model të tillë shtypës.
Si zgjidhje, Lapaj propozoi dorëheqjen pa kushte të Ramës, krijimin e një qeverie tranzitore të përbërë nga intelektualë përtej partive me mandat 12 mujor për organizimin e zgjedhjeve të lira dhe të ndershme, reformimin e Kodit Zgjedhor për demokratizimin e vendit dhe depolitizimin e administratës zgjedhore.